SURPRESA

Abi ko owa eo’t a it baeatyagon,
Owa’t kanta, owa’t handum
Ro maila nga taguipusoon ko ngara.

Ugaling sa imong pag-abot daea mo
Rong dupoy-dupoy nga fresco
Ro imong alima hay naka-agbay
Sa akong abaga sa oras nga nagakinahang-ean it amiga.
Imo ako nga guinpukaw,
Guinpasadya ku imong matalinghagang limog,
Guinbasbasan it tubi nga dalisay
Ag ro imong maea-engkantadang presencia
Hay nagpabakod kakon,
Nagdaea it kaeangkag
Ag ako hay nalikupan it kahamungaya.

Owa ko hipan-uhi, owa ko hitaeupangdi,
imo eo’t ang binihag
Ro mahugop nga taguipusoon ko ngara!