IHAPON SA PLAZA

Sueangon ko ikaw hinduna,
Kung ro mga agagangis hay gakinanta eon
Ag ro adlaw hay nagaharo sa ayutong it Eumati
Nga mapamantawan mo sa may bintana.

Atong sakyan ro guinrentahan ko nga Mercedes Benz
Kay “la Moning nga tag-ana ku Urban Funeral Homes.
Ugaling, ihatod ko anay it una si ‘tay Mabing
Agod nga may matukar ku sonata ni Paganini
Sa atong pag-abot sa banwa una banda sa ay ‘tay Libing.

Hahueam ko eon ngani ro kandilabra kay Padre
Ag haplastar eon ku a’ng bodyguard ro lamisa.
Nag-abot eon man ro sang-dosena nga rosas nga puea
Nga akong guin-order sa Hardin de Badana.

Sinigang nga sugpo ro akong guin-eaha
Nga may eamhay nga tangkong ag labanos
Nga guin-utang ko kay ‘nay Baning.
Pero si Luis hay naglitson it urok
Ag may fruit salad man nga guin-obra si Nanay.
Kung hidunlan ka, may una nga Sprite nga guinbakae ko kay Hanna
Nga pwede mo hieag-ok—basta “magpakatotoo ka!”

Ngani hay dapat nga naka-cocktail dress ka guid
Agod bagayan man sa okasyon.
Ag isuksok mo gali ro ing sing-sing,
Ipahid mo man sa imong dughan ag sa idaeom
It imong dueonggan ro Chanel nga guinregalo ko anay kimo
Ku nagtaliwan nga Valentine’s.

Ay ako man ngani hay magasuksok it coat and tie nga akong hahueam
Sa akon anay nga classmate sa RMSAT (RMCAT eot’a makaron)
Nga medyo asenso eot’a sa anang negosyo, si Felix Sampaton.
Guinsukat ko eon ngani ag nanami-an guid imaw.
Ana ako nga guinhanduan nga kon pwede kuno ako nga mangin modelo
It eambong—ag kabaong. Sinakon hay indi eagi ako makadesisyon
Ay kimo ako pa hay maeaong.

Sa akong puepini-ino, hay mayad man
Nga makaon kita sa guwa,
Presko ag romantiko
Samtang sigue ro tukar ku violin ni ‘tay Mabing.
Indi eang pagkalimti ro ing kaeo
Ay bangod ku tun-og ikaw hay basi sip-unon.

O, s’ya sigue. Hinduna ha?