SA AKONG KAUHAW

Paano ko baea isugid kimo
Pamatyagan ko nga guinakueang
It hambaeanon agod
Ipahangop ro akong panamgo.

Kuno ikaw hay lin-ay nga nagapahilay-hilay
Nagabuead ku imong maeupsi nga panit
Rina sa baybay.
Samtang ako hay nagapalitik
Kon paano mo hitaw-an it igtaeupangod
Ay nabudlayan man hipaeupad
Ro bulador nga hinueam ko sa unga
Ni ‘tay Insik.

Paano baea nga magsub-eang
Ro panueok ku atong mga mata
Ay sige ma’t a ro imong basa.
Pwede baea nga taw-an ta eon lang
It maeamig nga 7-Up ag i-rason ko nga :”Mainit Kasi?”

Matsa corny. Pero, owa’t kaso
Basta eang nga hipan-uhan mo ako.
Basi pa man lang…
Owa man siguro it maeain nga
Dayawon ko sa panueok ro imong ka-guapa
Samtang sige ro eag-ok it 7-Up
Eamang agod biskan paano
Malipatan ko ro a’ng kauhaw
Makaron nga sige ro silak ku adlaw.