HUMOT KU NAGTALIWAN

Ku Sabado, mga alas 9:48 sa gabii,
ka’t ro kanta ni Barry Manilow nga
“Somewhere Down the Road” hay nagatukar
sa akong Sharp Stereo nga ona
sa akong kwarto,

ro humot ku bueak nga imo
kakon nga guinta-o hay akong hahumgan.
Guin-igpit ku imaw sa akong Journal
nga akon nga nakaugalian nga bukaron kada

gabii bago ako magtueog agod
isueat ro mga hitabo ku adlaw nga nagtaliwan,
ro mga nahataeupangdan sa palibot,
ro mga likod nga mensahe ku akong pinalangga.

Makaron, siyam nga adlaw eon ro nagtaliwan,
ro hugom hay nagapadayon sa pagta-o
it kahumot sa kwarto ko nga madueom,
nagapadumdum ku nagtaliwan nga kasadya

ka’t iya ka pa anay sa akong euyo
nga nagasandig sa akong abaga
ag naga-istorya nahanungod sa mga kanding
nga nagahang-eab sa pilapil sa tabok ku tangki

nga atong guinapamantaw kon hapon.
Imong hambae hay naga-uli eon
sanda sa baeay ku andang amo
nga sa atong guinapungkoan nga bato

hay indi makit-an
bangod ku kahoy nga nagasalipod,
nga ku ulihi atong hataeupangdan
bangod ku humot nga gali ‘t a hay Ilang-ilang.

Guintan-aw ta kon may baeay o owa,
ag tama ‘t a ako, ay owa guid man
pero hay pareho kita nga nalipay
bangod ku pagka-taeupangod
ku mahumot nga bueak

nga nagatubo sa atong maisot nga paraiso.
Pero rato hay humot eon lang ku nagtaliwan
ay makaron eo’t a ikaw hay mapanaw.
Vaya con Dios, dahan eang, akong Ilang-ilang.
Ro imong humot iya man guihapon sa akong panumduman.