Kunta

Kunta hay tama si Einstein

 Nga mahinay 't a do adlaw magtunod una sa inyong sanib

Agud sa rato hay bisan paalin eon lang

Ako kimo hay maka-anib

Ag bukon nga kita hay magsub-eang

Sa daean nga makitid nga paeanta nga nataeangan

Ku tawo nga umaeagi kumo daean 't a ku maila ag matulin nga marae

Nga ginahamdum na nga isumsuman sa sangka lapad nga Emperador

 Kaibahan si Sartre ag Wittgenstein.

Kunta hay may kaisog ako sa pagsabat

Sa imong pangutana nga kon ham-an

Nga ako kimo hay pirmi eang ginahidlaw

Nga kon imo nga huyapon, maabo nga bes kita naga-iba sa matag-adlaw

Tumaeagsahon eamang rong tini-on sa akon nga panan-aw

Nga ikaw pirmi ko nga maka-ibahan

Akon nga pamatyag, madasig 't a ro haponanon magbaktas sa nakatungdan

Akon nga pangamuyo kaanib ko ikaw makaron, hin-aga hasta sa katapusan

Kunta mangin raya man rong imo nga pamat-bat. 

Sa Baeay nga Matalinhaga

Idto sa amon sa may dagasanan it sapa

Kun siin sugilanon ni Lola idto nagapanago ro muwa

May puno it ambueong sa a gamut may Baeay nga Matalinhaga

Sieilungan it sili pati eon kung puyo, oeang ag ku masangag nga paka.

Si Nay Yuning nga among kaeapit, ro pak-eang ku ambueong ana nga gintapas

Ro dahon ginsasa, grasya nga atop pananglit nga makataewas

Sa uean ag silak magabugay it kasulhay sa ginagaoy nga eawas

Idto sa amon sa may dagasanan it sapa imaw makatibawas.

Si Ricky nga apo ku among kaeapit, ahit nga unga

Ro muwa ginpaeas kaibahan rong masangag nga paka

Ro gamut ku ambueong sinamad, ginsag-ahan kat hil-o, Baeay nga Matalinhaga

Makaron, owa eot’a it sili, puyo, o oeang, idto sa amon sa may dagasanan it sapa.

Ro mga may pag-ulikid sa among banwa nagapanawagan

Pagsueondan nga katilingbanon, kustombre ag kinamugtawan

Angay ag bangay katon it bag-o nga henerasyon nga atong pahaegahan

Bueawanon nga agahon aton nga abi-abihon sa Baeay nga Matalinhaga, idto sa amon.